Pambansang bayani siyang tinagurian

Dahil nilabanan daw niya ang mga mananakop sa mapayapang paraan

Mapayapang paraan sa pagsulat ng dalawang nobela

Na nagmulat at nanggising sa damdamin ng mga mamamayang kung tawagin noon ay indiyo

Dalawang nobela na magpahanggang ngayon ay pinahahalagahan

Pinahahalagahan dahil wala na nga sigurong makakahigit sa mga nobelang nalimbag

At wala na rin sigurong  makahihigit sa pagmamahal mo sa Bayang Pilipinas at mga Filipino

Ang kabataan ang pag-asa ng bayan

Isa sa mga kawikaang iyong tinuran

Na magpahanggang ngayon

Ay ating pinahahalagahan

Libong taon man ang dumaan, ikaw ay mananatili sa aming isipan at sa isipan ng mga darating na henerasyon

Hindi lang dahil sa mga aral at leksiyon sa apat na sulok ng paaralan, hindi lang dahil sa mga lugar na tinawag na Rizal, hindi lang dahil sa dalawang nobelang iyong sinulat

Kungdi sa mga kwento at larawan na ngayon ay mahahanap sa modernong teknolohiya

Teknolohiyang noon pa man ay unti-unti mo nang sinimulan

Salamat Rizal, salamat,

Maaga ka mang nag “Mi Ultimo Adios”

Buhay na buhay ka naman sa puso at isipan ng mga Filipino

Dahil sa mga kawikaang iyong tinuran, mayamang alaala ng iyong buhay