Pagsuko is a tagalog poem written and shared by Reiu Somao-I to The Ugly Writers under the theme Love this month of May.

 

Pagsuko

 

Nagkita tayo sa isang di inaasahang pagkakataon

Sa isang maliit na silid na parang kahon

Di sinasadyang magkatitigan sa maghapon

Mga matang may mensaheng matatagpuan sa dakong paroon

Ang mga usapan ay nagsimula sa tanungan

Ang puso’y umindayog sa saliw ng duyan

Ikaw nga ang nagbigay kulay sa mundong nanlamig

Ang pagdaloy ng damdamin ay muling umikot tulad ng daigdig

Nang aking mapagtanto, huli na ang lahat

Ako’y nahuhulog na sayo at di dapat

Alam kong ang lahat ng ito’y ilusyon

Ngunit bakit pilit ko pa ring hinahanapan ng solusyon?

Masakit, kahit pa di aminin, ito ang reyalidad

Ang itataya sa larong ito ay dangal at dignidad

Patawad, ngunit hindi ako lalaban mag-isa

Hindi ito ang pinangarap kong istorya

Nasayang ang ating pinagsamahan

Nagising sa aking kamalayan

Ang lahat ng ito’y panaginip

At ako’y nahumaling sa isang kathang-isip

Ikaw ang pinapangarap ko

Sayo nadama ang nais ng puso

Ikaw ang nagpadama ng halaga

Sayang, di nga lang maari talaga

Suko na ako, ang puting bandila’y itatapon na

Salamat sa atensyon at paghanga

Sa mga tulang inialay at kantang inawit

Maging sa paglayong nagdulot ng labis na sakit

Bawal na pag-ibig, hindi dahil nakatali tayo sa iba

Pinagtagpo ngunit di para sa isa’t-isa

Damdami’y iisa ngunit di maaaring isigaw

Ang lipunan at panahon ang ating kaagaw

Mahal, kung tayo man ay magkita sa susunod na buhay

Hiling ko’y sana ako naman ang piliin

Ang mga guhit nati’y bibigyan na ng kulay

Damdamin ay di na itatanggi at ito’y didinggin

Sa ngayon,  ako’y sumusuko na at di na aasa

Magiging martir sa kasalukuyan at sasabihing masaya na

Babalik sa pagiging manhid at ikukulong ang mga salitang nais iusal

Ipagkakatiwala na lamang ang kagalingan ng puso sa mga maikling dasal

 

Please support Ms. Reiu Somao-I by reading her previous entry at The Ugly Writers:

the ugly writers