the ugly writers

Dahon

kahit madalas kinakapos ang kanyang hininga para dalhin ako sa iyo. nasaan ba ang tahanan? ilang ihip ng hangin ba ang tatangay sa isang dahon para makabalik sa paanan ng kanyang pinagmulan?

Dahon is a tagalog poem written by Erwina Boizet and shared with The Ugly Writers for the theme Recovery for the month of March.

 

Dahon

 

kahapon

pinintahan ko ang paligid

nakatutuwang sa isang iglap

nababago ang kulay ng mundo.

dinadama ang ihip ng hangin

nagpapatangay-

sa malayo

sa kabilang dako

sa kalayaan

sa mga sanga ng iyong pag-iisip.

kahit madalas

kinakapos ang kanyang hininga

para dalhin ako sa iyo.

nasaan ba ang tahanan?

ilang ihip ng hangin ba

ang tatangay sa isang dahon

para makabalik sa paanan

ng kanyang pinagmulan?

ilang alon ang magpapalit ng sarili

para lumitaw ang tunay na siya?

pumapasok tayo sa mga kahon

ng kaakuhan

na akala natin ay tayo

at pilit winawaglit ang katotohanan

na habang sinasambit ang ikaw

ay hindi mo naman talaga

naaninag ang iyong liwanag

ang iyong katotohanan.

ilang kulungang panlipunan

ang papasukin

bago maisip

na dito

dito

kasama natin ang lahat

maliban sa sarili.

dahil kung sa buong sandali ng buhay

na pinili mong magtago

sa bandang huli’y

matutuklasan nating

naikakahon ang katawan

pero hindi ang kaluluwa

subalit huli na.

sa mga dilim ng gabing

wala kang makita

bakit tila mas may ganda?

sa iyong mga panaginip

iisa ka at ang iyong naisin

malaya.

dahil hindi

hindi ito maari

sa isang umagang

puno nga ng liwanag

pero wala kang maaninag

na katotohanan

mula sa iba

mula sa sarili.

paano

kung ang dilim mo pala

ay siya mong liwanag?

ilang karatula

ilang direksyon ang kailangang sundin

para hindi mawala?

paulit-ulit ko nang binabagtas

ang daan papuntang bahay

pero lagi pa rin akong naliligaw.

tama ba ang aking hinahanap?

matatagpuan ko ba ang kasagutan?

paano kung mali ang aking mga tanong?

makikita ko lang ba ang sarili sa salamin

na hindi ko kailanman

maaring pasukin?

paano kung pagsuko

ang sagot

sa isang walang katapusang

paghahanap?

patuloy kong sinisilip ang pag-asa

sa mga dingding

na walang bintana.

 

If you liked this tagalog poem, check out some more below:

the ugly writers

the ugly writers

the ugly writers

the ugly writers

Default image
erwina boizet
Articles: 1

Leave a Reply